વન-ડે ઈન્ટરનેશનલમાં રત કોહલીના વર્લ્ડ રેકોર્ડ 50મી સદી બાદ ભારતના પૂર્વ કેપ્ટન સૌરવ ગાંગુલીએ કહ્યું કે આ ખેલાડી તેની કારકિર્દીમાં ઘણી વધુ સિદ્ધિઓ હાંસલ કરશે તેમાં કોઈ શંકા નથી. વિરાટ કોહલીએ વાનખેડે સ્ટેડિયમ ખાતે ન્યૂઝીલેન્ડ સામેની વર્લ્ડ કપ સેમિફાઇનલ દરમિયાન તેની 50મી ODI સદી ફટકારી અને તેના આદર્શ સચિન તેંડુલકર કરતાં એક સદી આગળ નીકળી ગયો.
‘કોહલીની કારકિર્દી હજી પૂરી નથી થઈ’
સૌરવ ગાંગુલીએ ઈડન ગાર્ડન્સમાં પત્રકારોને કહ્યું, ‘વિરાટ કોહલીની સિદ્ધિ સુધી પહોંચવા માટે ઘણા પ્રયત્નો કરવા પડશે. તેની કારકિર્દી હજી પૂરી થઈ નથી. આ એક અદ્ભુત સિદ્ધિ છે.’ આ પ્રસંગે સૌરવ ગાંગુલીએ આક્રમક ક્રિકેટ રમવા બદલ ભારતીય ટીમની પ્રશંસા કરી હતી.
સૌરવ ગાંગુલીએ કહ્યું, ‘ભારત આ સમયે અવિશ્વસનીય ક્રિકેટ રમી રહ્યું છે. પછી તે રોહિત શર્મા હોય, શુભમન ગિલ, શ્રેયસ અય્યર અથવા કોઈપણ બોલર. આ એક સંપૂર્ણ ટીમ છે, આ ટીમમાં જબરદસ્ત પ્રતિભા છે, પરંતુ અમારે એક સમયે એક મેચ વિચારવાની જરૂર છે.
ઐતિહાસિક ક્ષણના સાક્ષી બનવાનો આનંદ
ફૂટબોલમાં ડેવિડ બેકહામનું સ્થાન ક્રિકેટમાં વિરાટ કોહલી જેટલું જ છે અને ઈંગ્લેન્ડનો ફૂટબોલ સ્ટાર એ વાતથી ખુશ છે કે તેણે ભારતના સ્ટાર ક્રિકેટરને નવી સિદ્ધિ હાંસલ કરતા જોયો.
વિરાટ કોહલીએ બુધવારે ન્યૂઝીલેન્ડ સામે વર્લ્ડકપની પ્રથમ સેમીફાઈનલમાં પોતાની 50મી સદી ફટકારીને સચિન તેંડુલકરનો રેકોર્ડ તોડ્યો ત્યારે બેકહામ પણ વાનખેડે સ્ટેડિયમમાં હાજર હતો. વિરાટ કોહલીની આ શાનદાર ઇનિંગ્સને નજીકથી નિહાળનાર બેકહામે કહ્યું કે તે આ ઐતિહાસિક ક્ષણનો સાક્ષી બનીને ખુશ છે.
વિરાટની બેટિંગ જોવી ખરેખર અકલ્પનીય છે
બેકહામે કહ્યું, ‘આ સ્ટેડિયમમાં હાજર રહીને એક ઐતિહાસિક ક્ષણનો સાક્ષી બનવાનો ખરેખર ઘણો આનંદ છે. તમે જાણો છો કે મેં આજે સચિન તેંડુલકર સાથે થોડો સમય વિતાવ્યો અને મને ખબર છે કે તેણે આ સ્ટેડિયમમાં શું મેળવ્યું છે. મને ખબર છે કે તેણે પોતાના દેશ માટે અને આ રમતમાં શું સિદ્ધિઓ હાંસલ કરી છે. પરંતુ આજે વિરાટની બેટિંગ જોવી ખરેખર અકલ્પનીય હતી. તમે સ્ટેડિયમનું વાતાવરણ જોઈ શકો છો. હું પહેલીવાર ભારત આવ્યો છું, પરંતુ હું અહીં યોગ્ય સમયે આવ્યો છું.’ બેકહામ યુનિસેફના ગુડવિલ એમ્બેસેડર તરીકે પ્રથમ વખત ભારતની મુલાકાતે છે.
