EPFO UPI Service: PFમાંથી પૈસા ઉપાડવાની લાંબી અને ઝંઝટભરી પ્રક્રિયા હવે સરળ બનવાની છે. કર્મચારી ભવિષ્ય નિધિ સંગઠન (EPFO) ટૂંક સમયમાં UPI આધારિત નવી સુવિધા શરૂ કરવાનું આયોજન કરી રહ્યું છે, જેના દ્વારા PhonePe, Paytm જેવા વોલેટ અને ATM મારફતે PFના પૈસા ઉપાડવાની સુવિધા મળશે.
હાલમાં, PF ઉપાડવા માટે કર્મચારીઓએ લાંબી પ્રક્રિયા અને દસ્તાવેજી કામકાજમાંથી પસાર થવું પડે છે. પરંતુ EPFOના નવા બદલાવના કારણે, આગામી સમયમાં UPI પેમેન્ટ પ્લેટફોર્મ મારફતે સીધા PF એકાઉન્ટમાંથી પૈસા ઉપાડવાની સુવિધા ઉપલબ્ધ થશે. આ સુવિધાને ટૂંક સમયમાં શરૂ કરવાની તૈયારીઓ ચાલી રહી છે.
NPCI સાથે ચાલી રહી છે ચર્ચા
ફાઇનાન્સિયલ એક્સપ્રેસના રિપોર્ટ અનુસાર, કર્મચારી ભવિષ્ય નિધિ સંગઠન (EPFO) એ PF ઉપાડ માટે UPI આધારિત સુવિધાનો સંપૂર્ણ બ્લુપ્રિન્ટ તૈયાર કરી લીધો છે. આ નવી સુવિધાને અમલમાં મૂકવા માટે નેશનલ પેમેન્ટ્સ કોર્પોરેશન ઓફ ઇન્ડિયા (NPCI) સાથે ચર્ચા ચાલી રહી છે.
જો બધું યોગ્ય રીતે આગળ વધશે, તો આગામી 2-3 મહિનામાં આ સુવિધા UPI પ્લેટફોર્મ પર લાઇવ થઈ શકે છે. આ બદલાવથી EPFOના લગભગ 7 કરોડ સભ્યોને ફાયદો મળશે. UPI ઇન્ટિગ્રેશન પછી, સભ્યો તેમની દાવાની રકમ સીધી ડિજિટલ વોલેટમાં મેળવી શકશે, જેનાથી ઉપાડ પ્રક્રિયા વધુ ઝડપી, સરળ અને મુશ્કેલીમુક્ત બનશે.
હવે PF ઉપાડની પ્રક્રિયા મિનિટોમાં થશે પૂર્ણ!
EPFO દ્વારા UPI સુવિધા શરૂ થયા પછી, કર્મચારીઓ માટે PF ટ્રાન્ઝેક્શન ખૂબ જ સરળ અને ઝડપી બની જશે. હાલ, મોટાભાગના કિસ્સાઓમાં PF ઉપાડની પ્રક્રિયા પૂરી થવા માટે લગભગ 7 દિવસ લાગે છે. પરંતુ UPI ઇન્ટિગ્રેશન બાદ, આ પ્રક્રિયા માત્ર થોડા કલાકો કે મિનિટોમાં પૂર્ણ થઈ જશે અને પૈસા સીધા લાભાર્થીના ખાતામાં જમા થઈ જશે.
કેવી રીતે કાર્ય કરશે EPFO ATM સુવિધા?
EPFO દ્વારા રજૂ કરાઈ રહેલી ATM સુવિધા ડેબિટ કાર્ડ જેવી જ રહેશે. પૈસા ઉપાડવા માટે, સબ્સ્ક્રાઇબર્સને તેમનો UAN (યૂનિવર્સલ એકાઉન્ટ નંબર) લિંક કરવો પડશે. પછી, OTP વેરિફિકેશન કરવાનું રહેશે, ત્યાર બાદ તેઓ સીધા ATM પરથી રોકડ ઉપાડી શકશે.
પોસ્ટ ઓફિસની યોજના: વાર્ષિક રૂ. 399 રોકાણ પર મળશે રૂ. 10 લાખ સુધીનો લાભ, જાણો કેવી રીતે?
આ નવી સુવિધાનો સૌથી મોટો ફાયદો એ છે કે PF ઉપાડવા માટે હવે એમ્પ્લોયરની મંજૂરી લેવાની જરૂર નહીં રહે. એટલે કે, કર્મચારીઓ પોતાનું PF સરળતાથી અને ઝડપથી ઉપાડી શકશે, જેનાથી સમગ્ર પ્રક્રિયા વધુ સરળ અને અસરકારક બનશે.
