કેન્દ્ર સરકાર દેશની છ જાહેર ક્ષેત્રની બેંકોમાં હિસ્સો વેચવાની યોજના બનાવી રહી છે. ET માં પ્રકાશિત થયેલા સમાચાર અનુસાર, કેન્દ્ર જાહેર ક્ષેત્રની બેંકોમાં 5-10 ટકા હિસ્સો ડિસઇન્વેસ્ટ કરવાની યોજના બનાવી રહ્યું છે. આ બેંકોમાં સરકારની 80 ટકાથી વધુ ઈક્વિટી છે. આ બાબત સાથે સંકળાયેલા સૂત્રોએ ETને જણાવ્યું હતું કે ટૂંક સમયમાં વિગતવાર રોડમેપ આવે તેવી શક્યતા છે.
હાલમાં સરકાર પાસે છ બેંકોમાં 80 ટકાથી વધુ શેર છે. આ બેંકોના નામમાં બેંક ઓફ ઈન્ડિયા, ઈન્ડિયન ઓવરસીઝ બેંક, પંજાબ એન્ડ સિંધ બેંક, બેંક ઓફ મહારાષ્ટ્ર, સેન્ટ્રલ બેંક ઓફ ઈન્ડિયા અને યુકો બેંકનો સમાવેશ થાય છે.
ETના અહેવાલ મુજબ સરકાર જાહેર ક્ષેત્રની બેંકોના શેરના ભાવમાં થયેલા વધારાનો લાભ લેવા માંગે છે. આ છ બેંકોએ ચાલુ ત્રિમાસિક ગાળામાં વધુ સારી નાણાકીય કામગીરીના કારણે સારો દેખાવ કર્યો છે. નિફ્ટી પીએસયુ બેંક ઇન્ડેક્સમાં આ વર્ષે 34 ટકાનો વધારો જોવા મળ્યો છે. જ્યારે નિફ્ટી પ્રાઈવેટ બેંક ઈન્ડેક્સ 6.9 ટકા વધ્યો છે. જોકે, આ સમયગાળા દરમિયાન નિફ્ટી 50 ઇન્ડેક્સ માત્ર 6.4 ટકા વધ્યો છે. સરકાર જે છ બેંકોમાં હિસ્સો વેચવાની યોજના બનાવી રહી છે તેમાં બેંક ઓફ ઈન્ડિયા (BOI) સૌથી મોટી છે.
IDBI બેંકમાંથી બહાર નીકળવાની વિચારણા
જો સરકાર બેન્ક ઓફ ઈન્ડિયા (BOI)માં 10 ટકા હિસ્સો વેચે છે, તો સરકારને હાલના શેર પર 4400 કરોડ રૂપિયા મળવાની અપેક્ષા છે. બીજી તરફ, સરકાર IDBI બેંકમાંથી બહાર નીકળવાનું પણ વિચારી રહી છે. IDBIને ખાનગી ક્ષેત્રની બેંક તરીકે ગણવામાં આવે છે.
મિન્ટના સમાચાર અનુસાર, સરકાર આ છ બેંકોમાં હિસ્સો ઘટાડીને રૂ. 28,000-54,000 કરોડ એકત્ર કરી શકે છે. જો સરકાર જાહેર ક્ષેત્રની અન્ય બેંકોમાં હિસ્સો વેચે તો તેને વધુ પૈસા મળી શકે છે. ઉદાહરણ તરીકે, સરકાર SBIમાં 6 ટકા હિસ્સો વેચીને 31,395 કરોડ રૂપિયા મેળવી શકે છે.
જાહેર ક્ષેત્રની બેંકોએ 2022-23માં તેમની સંપત્તિમાં 9.1 ટકાનો વધારો કર્યો છે. સેન્ટ્રલ બેંક ઓફ ઈન્ડિયા અને ઈન્ડિયન ઓવરસીઝ બેંકે તેમની લોન અને એડવાન્સમાં 20 ટકાનો વધારો કર્યો છે. કુલ સંપત્તિના સંદર્ભમાં બેંક ઓફ મહારાષ્ટ્ર સૌથી વધુ વૃદ્ધિ સાથે ટોચ પર હતી.
ગ્રાહકો પર શું અસર થશે?
જો સરકાર છ બેંકોમાં 5 થી 10 ટકા ડિસઇન્વેસ્ટ કરે તો ખાનગી ક્ષેત્રનો હિસ્સો વધશે અને સરકારનો હિસ્સો ઘટશે. આનાથી બેંકિંગ કામગીરી અને ખાતાધારકોને કોઈપણ રીતે અસર થશે નહીં. બેંકોમાં સમગ્ર પ્રક્રિયા પહેલાની જેમ જ ચાલુ રહેશે.
