બાંગ્લાદેશી ટીમ શનિવારે ઈતિહાસ રચવામાં એક ડગલું દૂર રહી. તેને ન્યૂઝીલેન્ડ સામેની શ્રેણીની બીજી ટેસ્ટ મેચ (BAN vs NZ 2જી ટેસ્ટ)માં 4 વિકેટથી હારનો સામનો કરવો પડ્યો હતો. આ સાથે જ બંને ટીમો વચ્ચે 2 મેચની ટેસ્ટ શ્રેણી 1-1ની બરાબરી પર સમાપ્ત થઈ ગઈ છે. ઓલરાઉન્ડર ગ્લેન ફિલિપ્સ અને મિશેલ સેન્ટનર વચ્ચેની ભાગીદારીના કારણે ન્યૂઝીલેન્ડને મીરપુર ટેસ્ટમાં જીત અપાવી હતી.
ઈજાઝે 6 વિકેટ લીધી હતી
લેફ્ટ આર્મ સ્પિનર એજાઝ પટેલ (57 રનમાં 6 વિકેટ)ની શાનદાર બોલિંગ બાદ દબાણ હેઠળ ગ્લેન ફિલિપ્સ અને મિશેલ સેન્ટનરની શાનદાર ભાગીદારીથી ન્યૂઝીલેન્ડે શનિવારે ચોથા દિવસ દરમિયાન બાંગ્લાદેશને 4 વિકેટે હરાવ્યું હતું. વરસાદથી પ્રભાવિત આ ટેસ્ટ જીતવા માટે ન્યુઝીલેન્ડને 137 રનનો ટાર્ગેટ હતો પરંતુ ટીમ 69 રનમાં 6 વિકેટ ગુમાવી દેતા મુશ્કેલીમાં મુકાઈ ગઈ હતી.
ફિલિપ્સ ફરીથી ‘ટ્રબલશૂટર’ બની
પ્રથમ દાવમાં 72 બોલમાં 87 રન બનાવીને ટીમને મુશ્કેલીમાંથી બહાર લાવનાર ફિલિપ્સે ફરી એકવાર મુશ્કેલીનિવારકની ભૂમિકા ભજવી હતી. તેણે બીજી ઈનિંગમાં 48 બોલમાં અણનમ 40 રન બનાવ્યા હતા. ફિલિપ્સે સેન્ટનર સાથે 7મી વિકેટ માટે 70 રનની અતૂટ ભાગીદારી કરીને ટીમની જીત સુનિશ્ચિત કરી હતી.
સેન્ટનરે 39 બોલમાં 3 ચોગ્ગા અને એક છગ્ગા સાથે અણનમ 35 રન બનાવ્યા હતા. મેન ઓફ ધ મેચ ફિલિપ્સે પોતાની ઇનિંગમાં 4 ફોર અને 1 સિક્સ ફટકારી હતી. બાંગ્લાદેશ તરફથી મેહદી હસને 52 રનમાં 3 વિકેટ જ્યારે તૈજુલ ઈસ્લામે બીજી ઈનિંગમાં 58 રનમાં 2 વિકેટ ઝડપી હતી. શરીફુલ ઈસ્લામને એક વિકેટ મળી હતી.
બાંગ્લાદેશ ઇતિહાસ રચવાનું ચૂકી ગયું
બાંગ્લાદેશે પ્રથમ દાવમાં 172 રન બનાવ્યા હતા જ્યારે ન્યુઝીલેન્ડે 180 રન બનાવ્યા હતા. બાંગ્લાદેશે પ્રથમ મેચ 150 રનથી જીતી લીધી હતી અને ન્યુઝીલેન્ડ સામે પ્રથમ વખત ટેસ્ટ શ્રેણી જીતીને ઈતિહાસ રચવાની તક હતી પરંતુ બીજી ઈનિંગમાં ખરાબ બેટિંગને કારણે ટીમે આ તક ગુમાવી દીધી હતી. લક્ષ્યનો પીછો કરતી વખતે ન્યૂઝીલેન્ડની શરૂઆત પણ ખરાબ રહી હતી. શોરીફુલે ડેવોન કોનવે (2)ને LBW આઉટ કર્યો, જ્યારે તૈજુલે કેન વિલિયમ્સન (11) અને મેહદીએ હેનરી નિકોલ્સ (3)ને આઉટ કર્યો.
મીરપુર મેદાનર પર યાદગાર જીત
ટોમ લાથમ (26) અને ડેરીલ મિશેલ (19) પણ સારી શરૂઆતને મોટી ઇનિંગ્સમાં ફેરવવામાં નિષ્ફળ રહ્યા હતા. જેના કારણે ટીમે 69 રનમાં 6 વિકેટ ગુમાવી દીધી હતી. આ પછી ફિલિપ્સે સેન્ટનર સાથે શાનદાર ભાગીદારી કરી અને બાંગ્લાદેશનો અભેદ્ય કિલ્લો ગણાતા મીરપુર મેદાન પર ટીમને યાદગાર જીત અપાવી. બાંગ્લાદેશે દિવસની શરૂઆત 2 વિકેટે 38 રનથી કરી હતી.
બાંગ્લાદેશની બીજી ઇનિંગમાં માત્ર ઝાકિર હસન જ ન્યુઝીલેન્ડના બોલરોનો હિંમતપૂર્વક સામનો કરી શક્યો. તેણે 86 બોલમાં 59 રનની ઈનિંગ દરમિયાન 6 ફોર અને 1 સિક્સર ફટકારી હતી. આ પછી બાંગ્લાદેશે 73 રનમાં 7 વિકેટ ગુમાવીને ન્યૂઝીલેન્ડને શ્રેણી બરોબરી કરવાની તક આપી હતી. આ પછી સેન્ટનેરે પોતાની સતત ઓવરમાં મુશફિકુર રહીમ (9) અને શહાદત હુસૈન (4)ને આઉટ કર્યા જેના કારણે બાંગ્લાદેશની અડધી ટીમ 88 રનમાં પેવેલિયન પરત ફરી ગઈ હતી.
