બુધવારે કેબિનેટની બેઠકમાં કેન્દ્રીય કર્મચારીઓ અને પેન્શનરો માટે મોંઘવારી ભથ્થું (DA) વધારવાની જાહેરાત કરવામાં આવી છે.
સરકારે તેમાં 3 ટકાનો વધારો કરવાનો નિર્ણય લીધો છે, ત્યારબાદ તે 50 ટકાથી વધીને 53 ટકા થઈ ગયો છે. ડીએ અને ડીઆરમાં વધારો 1 જુલાઈ, 2024થી લાગુ કરવામાં આવશે.
વડાપ્રધાન નરેન્દ્ર મોદીની અધ્યક્ષતામાં બુધવારે મળેલી કેબિનેટ બેઠકમાં લેવાયેલા નિર્ણયથી એક કરોડથી વધુ કેન્દ્રીય કર્મચારીઓ અને પેન્શનરોને ફાયદો થશે.
આ દરમિયાન, પાંચ રાજ્ય સરકારોએ પણ સરકારી કર્મચારીઓ માટે મોંઘવારી ભથ્થા (DA)માં વધારો કરવાની જાહેરાત કરી છે. વધતી મોંઘવારી વચ્ચે ડીએમાં વધારો કર્મચારીઓને નાણાકીય રાહત આપશે.
દિવાળી પહેલા ડીએમાં વધારો અને પેન્શનરો માટે મોંઘવારી રાહત (DR)માં 3%નો વધારો 1 જુલાઈ, 2024થી લાગુ થશે. ઓક્ટોબર મહિનાના વધેલા પગારની સાથે કર્મચારીઓ અને પેન્શનધારકોને ત્રણ મહિનાનું એરિયર્સ પણ આપવામાં આવશે. ચાલો જાણીએ આ સિવાય કઈ રાજ્ય સરકારોએ કર્મચારીઓને દિવાળીની ભેટ આપી છે?
ઓડિશા સરકારે રાજ્યના જાહેર ક્ષેત્ર (પીએસયુ) માં કામ કરતા કર્મચારીઓ માટે મોંઘવારી ભથ્થા (DA) માં 4% વધારાને મંજૂરી આપી છે.
તેઓ 2017 ના સુધારેલા પગાર ધોરણના આધારે પગાર મેળવી રહ્યા છે. આ વધારા પછી, DA 46% થી વધીને 50% થઈ ગયો છે. તેનો અમલ 1 જાન્યુઆરી, 2024થી કરવામાં આવ્યો છે.
દશેરાના અવસર પર, હિમાચલ પ્રદેશના મુખ્યમંત્રી સુખવિંદર સિંહ સુખુએ સરકારી કર્મચારીઓ અને પેન્શનરો માટે મોંઘવારી ભથ્થા (DA)માં 4% વધારાની જાહેરાત કરી. તેનો અમલ 1 જાન્યુઆરી, 2023થી થશે.
આ ઉપરાંત સરકારી કર્મચારીઓના બાકી મેડિકલ બીલ અને 75 વર્ષથી વધુ વયના પેન્શનરોના પેન્શનના બાકી નીકળતા તત્કાલ પતાવટ કરવામાં આવશે.
ઝારખંડ સરકારે સરકારી કર્મચારીઓ માટે મોંઘવારી ભથ્થા (DA)માં 9%નો વધારો કર્યો છે. અગાઉ કર્મચારીઓને છઠ્ઠા કેન્દ્રીય પગાર પંચ હેઠળ 230% ડીએ મળતું હતું.
નવા પગાર વધારામાં તે વધારીને 239% કરવામાં આવ્યો છે. જે સરકાર દ્વારા 1 જાન્યુઆરી, 2024થી અમલી બનાવવામાં આવશે.
દિવાળી પહેલા, છત્તીસગઢના મુખ્યમંત્રી વિષ્ણુ દેવ સાઈએ રાજ્ય સરકારના કર્મચારીઓ માટે મોંઘવારી ભથ્થા (DA)માં 4% વધારાની જાહેરાત કરી હતી. આ પછી કુલ મોંઘવારી ભથ્થું વધીને 50% થઈ ગયું છે.
સિક્કિમ સરકારે દુર્ગા પૂજા તહેવાર પહેલા તેના કર્મચારીઓ માટે મોંઘવારી ભથ્થા (DA)માં 4% વધારાની જાહેરાત કરી છે. રાજ્ય સરકારના કર્મચારીઓને 1 જાન્યુઆરી, 2024થી 46%ને બદલે 50% ડીએ મળશે.
