Cyclone Remal LIVE : વાવાઝોડાંની લેન્ડફોલની પ્રક્રિયા શરૂ થઈ છે ત્યારે વાવાઝોડાંની અસરના ભાગરૂપે કોલાકાતાના કેટલાક વિસ્તારોમાં તોફાની પવન સાથે ભારેથી અતિભારે વરસાદની શરૂઆત થઈ ગઈ છે.
બંગાળની ખાડી પર બનેલી ‘નીચા દબાણની સિસ્ટમ’એ પવનોને ચક્રવાતી વાવાઝોડામાં ફેરવી દીધા છે. પશ્ચિમ બંગાળના દક્ષિણ અને ઉત્તર 24 પરગણા તટીય જિલ્લાઓમાં 26-27 મે માટે ‘રેડ એલર્ટ’ જારી કરવામાં આવ્યું છે, જ્યારે કેટલાક વિસ્તારોમાં ભારે વરસાદની સંભાવના છે.
હવામાન વિભાગે કહ્યું કે જ્યારે ‘રેમલ’ દરિયાકાંઠે પહોંચશે ત્યારે 110 થી 120 કિલોમીટર પ્રતિ કલાકની ઝડપે પવન ફૂંકાશે અને તેની ગતિ 135 કિલોમીટર પ્રતિ કલાકની હશે.
Cyclone Remal LIVE: પ્રી-મોન્સુન સિઝનમાં બંગાળની ખાડીમાં ત્રાટકનાર આ પ્રથમ ચક્રવાત છે. હવામાન કચેરીએ પશ્ચિમ બંગાળ અને ઉત્તર ઓડિશાના દરિયાકાંઠાના જિલ્લાઓમાં 26-27 મેના રોજ ભારે વરસાદની ચેતવણી જારી કરી છે.
આસામ અને મેઘાલયમાં પણ ભારે વરસાદની સંભાવના છે. મણિપુર, નાગાલેન્ડ, અરુણાચલ પ્રદેશ અને ત્રિપુરામાં 27-28 મેના રોજ ભારેથી અતિ ભારે વરસાદની અપેક્ષા છે.
ઉત્તર અને દક્ષિણ 24 પરગણા, પૂર્વ મેદિનીપુર, કોલકાતા, હાવડા અને હુગલી જિલ્લામાં ભારેથી અતિ ભારે વરસાદની આગાહી કરવામાં આવી છે. ઉત્તર અને દક્ષિણ 24 પરગણા અને પૂર્વ મેદિનીપુર જિલ્લામાં ભારે વરસાદની સંભાવનાને કારણે આ વિસ્તારો માટે ‘રેડ એલર્ટ’ જારી કરવામાં આવ્યું છે.
28-29 મેના રોજ ઉત્તર બંગાળ, કૂચ બિહાર, અલીપુરદ્વાર અને જલપાઈગુડીના જિલ્લાઓમાં ભારે વરસાદની સંભાવના છે. આ સિવાય દાર્જિલિંગ, કાલિમપોંગ, ઉત્તર અને દક્ષિણ દિનાજપુર જિલ્લામાં ભારે વરસાદની સંભાવના છે.
IMD એ પશ્ચિમ બંગાળના દક્ષિણ અને ઉત્તર 24 પરગણા જિલ્લામાં પૂરની ચેતવણી આપી છે અને નબળા બાંધકામો, પાવર અને કોમ્યુનિકેશન લાઈનો, પાકા રસ્તાઓ, પાકો અને બગીચાઓને ભારે નુકસાન થવાની ચેતવણી આપી છે. તેમજ અસરગ્રસ્ત વિસ્તારોના લોકોને ઘરની અંદર રહેવાની સલાહ આપવામાં આવી છે.
આ પણ વાંચો: વરસાદ નક્ષત્ર 2024 : ક્યું નક્ષત્ર ક્યારે શરૂ થશે? કયું વાહન? ક્યાં નક્ષત્રમાં કેટલો વરસાદ? જાણો નક્ષત્ર અંગેની સંપુર્ણ માહિતી….
ચક્રવાતને કારણે પશ્ચિમ બંગાળના દરિયાકાંઠાના જિલ્લાઓમાં ભારે વરસાદ અને કોલકાતાની આસપાસના વિસ્તારોમાં ભારેથી અતિ ભારે વરસાદની અપેક્ષા છે. તેથી, એવું કહેવામાં આવી રહ્યું છે કે વડા પ્રધાન નરેન્દ્ર મોદીએ ચક્રવાત રામલની પ્રતિક્રિયા અને તૈયારીઓની સમીક્ષા કરવા માટે એક બેઠકની અધ્યક્ષતા કરી છે.
હવામાન કચેરીએ જણાવ્યું હતું કે ‘રેમલ’ ઉત્તર તરફ આગળ વધી રહ્યું છે અને રવિવારની મધ્યરાત્રિ સુધીમાં મોંગલા બંદરની દક્ષિણ-પશ્ચિમ નજીક સાગર દ્વીપ (પશ્ચિમ બંગાળ) અને ખેપુપારા (બાંગ્લાદેશ) વચ્ચેના દરિયાકાંઠાને પાર કરતા પહેલા વધુ તીવ્ર થવાની સંભાવના છે.
પશ્ચિમ બંગાળ અને બાંગ્લાદેશની સરહદો પર 9,630 ચોરસ કિલોમીટરમાં ફેલાયેલું સુંદરવન, આબોહવા પરિવર્તનને કારણે દરિયાની સપાટીમાં વધારો, ખારાશ અને જમીનના ધોવાણથી સૌથી વધુ અસરગ્રસ્ત વિસ્તારોમાંનો એક છે.
વૈજ્ઞાનિકોનું કહેવું છે કે દરિયાની સપાટીના ગરમ તાપમાનને કારણે ચક્રવાતી તોફાનો વધુને વધુ તીવ્ર બની રહ્યા છે અને લાંબા સમય સુધી પોતાની તાકાત જાળવી રહ્યા છે. આઈએમડીના વરિષ્ઠ વૈજ્ઞાનિક ડીએસ પાઈના જણાવ્યા અનુસાર, દરિયાની સપાટી ગરમ થવાનો અર્થ વધુ ભેજ છે, જે ચક્રવાતને વધુ તીવ્ર બનાવવા માટે પૂરતું છે.
