નવી મગફળીના ભાવમાં તેજી: આજનો ઉંચો ભાવ રૂ. 1585, જાણો આજના મગફળીના બજારભાવ

મગફળીની બજારમાં દિવાળી બાદ નરમ માહોલ છે. ખાસ કરીને સીંગદાણાનાં ભાવ ટને રૂ. 2000થી 2500 દિવાળી બાદ ઘટી ગયા હોવાથી અને સીંગતેલ પણ અંદરખાને નરમ હોવાથી મગફળીની બજારમાં મણે રૂ. 15થી 20નો ઘટાડો થયો હતો. ગુજરાતમાં સરકાર દ્વારા મગફળીની ટેકાનાં ભાવથી ખરીદી શરૂ થઈ ગઈ છે પરંતુ હજી સુધી ખાસ કોઈ ખરીદી થઈ નથી , કારણ કે બજારમાં ભાવ હજી ઊંચા છે. આગામી દિવસોમાં સરકારને બહુ મગફળી મળે તેવી પણ સંભાવનાં હાલ ઓછી છે.

મગફળીનાં વેપારીઓ કહે છે કે, વર્તમાન સંજોગોમાં મગફળીની બજારમાં નરમ ટોન છે અને આગળ ઉપર બજારમાં વધુ ઘટાડો થાય તેવી ધારણાં દેખાય રહી છે પરંતુ જો સીંગતેલનાં ભાવ વધે તો જ બજારમાં ઘટાડો અટકી શકે છે.

જાડી મગફળીના બજાર ભાવની વાત કરીએ તો ગઈ કાલે તારીખ 01/11/2022 ને મંગળવારના ગોંડલ માર્કેટ યાર્ડમાં જાડી મગફળીના 27351 ગુણીના વેપારો થયા હતા અને તેના ભાવ રૂ. 830થી 1386 સુધીના બોલાયા હતાં. જ્યારે હળવદ માર્કેટ યાર્ડમાં જાડી મગફળીના 12251 ગુણીના વેપારો થયા હતા અને તેના ભાવ રૂ. 1050થી 1462 સુધીના બોલાયા હતાં.