નવી મગફળીના ભાવમાં ભારે ઉછાળો: આજનો સૌથી ઉંચો ભાવ રૂ. 1711, જાણો આજના મગફળીના બજારભાવ

મગફળીની બજારમાં મજબૂતાઈ યથાવત છે. ગુજરાતમાં વરસાદી વાતાવરણને કારણે મગફળીની આવકો ઘટી છે. ગોંડલમાં પણ નવી આવકો ઘટતા 25 ટકા જેવી આવકો ઘટી હતી. સરેરાશ આવકો ઓછી અને સામે લેવાલી સારી હોવાથી મગફળીની બજારમાં મણે રૂ. 10થી 20નો સુધાર થયો હતો. હિંમતનગરમાં દાણાબર સારી મગફળીનાં અમુક વકલ રૂ. 1741 સુધીમાં વેચાણ થયાં હતાં.

ગોંડલનાં મગફળી બ્રોકરે જણાવ્યું હતું કે, હાલનાં સંજોગોમાં બજારમાં લેવાલી સારી છે. વળી આ વર્ષે સિઝનની જે મગફળી અત્યાર સુધીમાં આવી તેમાંથી 50 ટકા માલ દાણાબરમાં ગયો છે, જે ગત વર્ષે દશેક ટકા માંડ ગયો હતો. આમ આ વર્ષે દાણાબર અને પિલાણ બંને વાળાની માંગ સારી હોવાથી ઊઘડતી સિઝને જ બજારમાં તેજીનો માહોલ જોવા મળી રહ્યો છે.

જાડી મગફળીના બજાર ભાવની વાત કરીએ તો તારીખ 08/10/2022 ને શનિવારના હળવદ માર્કેટ યાર્ડમાં જાડી મગફળીના 14018 ગુણીના વેપારો થયા હતા અને તેના ભાવ રૂ. 1101થી 1500 સુધીના બોલાયા હતાં. જ્યારે ગોંડલ માર્કેટ યાર્ડમાં જાડી મગફળીના 12074 ગુણીના વેપારો થયા હતા અને તેના ભાવ રૂ. 911થી 1491 સુધીના બોલાયા હતાં.