નવી મગફળીના ભાવમાં તેજી: આજનો ઉંચો ભાવ રૂ. 1874, જાણો આજના મગફળીના બજારભાવ

મગફળીની બજારમાં ઓછી વેચવાલી વચ્ચે ભાવમાં મજબૂતાઈ જોવા મળી હતી. સીંગતેલ લુઝનાં ભાવ સ્ટેબલ છે અને સામે સારી ક્વલિટીની મગફળી ઓછી આવે છે, જેને પગલે બજારો વધ્યા છે. રાજકોટમાં મગફળીનાં ભાવમાં રૂ. 15થી 20નો સુધારો જોવા મળ્યો હતો. આગામી દિવસોમાં ખાદ્યતેલ અને સીંગદાણાની બજાર ઉપર જ મગફળીનાં ભાવનો આધાર રહેલો છે.

મગફળીનાં વેપારીઓ કહે છે કે સૌરાષ્ટ્રમાં ચૂંટણી પૂરી થઈ ગઈ છે અને હવે સોમવારથી મગફળીની આવકો કેવી થાય છે તેનાં ઉપર સૌની નજર છે. આવકો વધે તો પણ બહુ વધારો થાય તેવું લાગતું નથી. બીજી તરફ આ વર્ષે નાફેડ પાસે મગફળી પડી નથી અને પાક ઓછો છે, પરિણામે લાંબા ગાળે સ્ટોકિસ્ટોનાં માલ ઉપર જ બજારો ચાલશે, પરિણામે અત્યારે મગફળીમાં કોઈ નીચા ભાવથી વેચાણ કરવા તૈયાર નથી.

જાડી મગફળીના બજાર ભાવની વાત કરીએ તો, તારીખ 03/12/2022 ને શનિવારના ગોંડલ માર્કેટ યાર્ડમાં જાડી મગફળીના 18237 ગુણીના વેપારો થયા હતા અને તેના ભાવ રૂ. 800થી 1311 સુધીના બોલાયા હતાં. જ્યારે હળવદ માર્કેટ યાર્ડમાં જાડી મગફળીના 3914 ગુણીના વેપારો થયા હતા અને તેના ભાવ રૂ. 1100થી 1431 સુધીના બોલાયા હતાં.