નવી મગફળીના ભાવમાં ભુક્કા બોલાવતી તેજી: આજનો ઉંચો ભાવ રૂ. 1680, જાણો આજના મગફળીના બજારભાવ

મગફળીની બજારમાં વેચવાલીનો અભાવ અને પિલાણ મિલોની અત્યારે માંગ સારી હોવાથી સરેરાશ ભાવ મજબૂત રહ્યાં હતાં. જોકે ગામડે બેઠા પણ ખેડૂતો નીચા ભાવથી વેચાણ કરવા તૈયાર ન હોવાથી બજારો ટકી રહ્યા છે. બીજી તરફ મગફળીની આવકો હવે એકદમ ઘટી ગઈ છે અને તેમાં હવે વધારો થવાની ધારણાં નથી. બીજી તરફ સીંગદાણાની બજારમાં પણ વેપારો પાંખા જોવા મળી રહ્યાં છે.

મગફળીનાં વેપારીઓ કહે છે કે, અત્યારે જેની જરૂરિયાત હોય તેવી જ મગફળીમાં માંગ છે અને નબળી ક્વોલિટીમાં કોઈ લેવાલ નથી. સાઈડ તેલો મજબૂત હોવાથી માત્ર જી-20માંથી બનેલા તેલની જ માંગ છે, પરિણામે જી- 20 મગફળીનાં ભાવ ઊંચા છે. ગામડે બેઠા ખેડૂતો કોઈ પણ મગફળી રૂ. 1300થી નીચે આપવા તૈયાર નથી, સરેરાશ મણે રૂ. 100 જેવો વધારો થઈ ગયો હોવાથી હવે કોઈને નીચામાં વેચવું નથી અને માલ પણ ખાસ પડ્યો નથી.

જાડી મગફળીના બજાર ભાવની વાત કરીએ તો, ગઈ કાલે તારીખ 26/12/2022 ને સોમવારના રોજ ગોંડલ માર્કેટ યાર્ડમાં જાડી મગફળીના 13623 ગુણીના વેપારો થયા હતા અને તેના ભાવ રૂ. 815થી 1361 સુધીના બોલાયા હતાં. જ્યારે જામજોધપુર માર્કેટ યાર્ડમાં જાડી મગફળીના 7000 ગુણીના વેપારો થયા હતા અને તેના ભાવ રૂ. 900થી 1350 સુધીના બોલાયા હતાં.